الحلقة السابعة شحادين بفهم

7
رائحة البن تغطي المكان و علي برش جلس والد احمد ووالدته يتناولون جبنة المساء لاحظت والدة احمد شرود زوجها
ام احمد : ها يا ابو احمد مالك الليله ؟ ما عوائدك شكلك بعيييد ما معانا
ابو احمد : بفكر في احمد و الله
ام احمد : عادة نعمل شنو دا مستقبلو يا ابو احمد ما بنقدر نمسكو والله انا راسي مقطوع و من اول امس ما لاقيه طعم الاكل
والد احمد : قلت خلاص الولد خلص يجي جنبنا و يقعد الا المستخبي كان سفرا بعيييد خلاص
والدة احمد : و الله يا ابو احمد راضيه عليه ولدي ما زعلني يوم
والد احمد : و انا كمانبحدي اسي انا مستغرب فيهو اهههههههه مشي اشتغل في المينا عتالي عشان ما يكلفني قروش السفر و الله كبر في نظري و خلاني افتخر اني عندي راجل تعتمد عليو في اي شئ ما قال انا قرئت و جامعه
والده احمد : طول عمرو احمد سند و هميم و ما بعرف العوجه و كيف يعرفها و انت ابوه علمتو و ربيتو علي الصاح و الغلط و البتربيه يطلع نجييييض
صمتا بعدها لحظات صب ابو احمد لنسفسه فنجال من الجبنه حك راسه و استمر الصمت لحظات بعدها ابتدرت الحديث والده احمد : ضربت علي بت اخوك امس و الله تبكي و تحنسني عشان اكلمو يغشاهم قبل السفر شدة ما تبكي لما الدنيا بقت لي مسيخه
اخرج والد احمد الهاتف بحث عن اسم ولدو : يا ام احمد النسلم عليه نشوفو عمل شنو
ام احمد : هو يا دابو ليه تلانه ايام ما اظنو يكون عمل حاجة
************************************************************************************
دقيقة يا سفير ما تضربهم : كان هذا صوت الرجل اذي قدم مع السفير
السفير: و نعمل معهم ايه هدول ما عندهم حدا يدفع لهم يا شيخ الصحراء
شيخ الصحراء: انت قلت العاوزو انا مافي حدا يدفع لهم بس كمان لو ضربتهم بالنار نضيع حقنا دول اكلو وشربو و نامو و جبناهم لهون خسرنا وقود و كمان تضربهم نار تخسر رصاص لازم يدفعو كل المصاريف لازم
السفير : نشغلهم يعني في الزريبه و يخدمو علي العندهم اهل دول
شيخ الصحراء : هدا الحديث اللي يطلع من الراس دا الكلام الجميل
طوال الحديث كان السفير يمسك بالكلاش في يده بعد ان اتفقا علي ان يتركو ليعملو ليسددو تكاليف ما صرف عليهم، رفع تامين الكلاش ثم جر التعمير ورفعه لاعلي ثم اطلق رصاصات في الهواء و التفت ناحية الجالسين : المرة البعديها راح تكون عليكم و التفت لرجاله تعال يا رجال خد البندق تبعك متشكرين ناخدو المره القادمه
كان الجميع في حالة خوف و كل قال في نفسه انها النهايه لا امل للنجاة لكن بعد ان وصلو للحل بان يعملو في خدمة المتواجدون في الجزء الاخر من الزريبه تنفسو الصعداء .
*************************************************************************************
مهدي : اها ياحمد كلمت ابوك انك باكر مسافر خلاص ؟
حمد : لا و الله لي بعدينن
مهدي : بتبالغ و الله مفترض تكلمهم من اول امس
حمد : كويس الاكلمو مع انو ما مصدقين انو انا لقيت عقد خاصه ابوي دا عمرو ما صدقني ما عارفو مالو معاي بس طوالي بفتكر اني مستهتر فاكر انو انا الما عاوز اشتغل ، اخرج تلفونه صوت جرس ثم صوت من الطرف الاخر : الو اي يا حمد في شنو
حمد : مساء الخير ابوي كيفك
الاب : مساء النور حمد الله اليوم من عوائدك خير
حمد : يا ابوي خلاص مسافر بكره انا
الاب : بالله قول و الله
حمد: و الله يابا
الاب : اخيرا حتعمل حاجه صاح و الله ربنا يوفقك يا ولدي ما تخيلت دا يحصل قلت تلقي وكاله من الضاربات ديل تغشك الا لكن برافو عليك ربنا يوصلك بالسلامه و تلقي اولاد الحلال في طريقك
صمت حمد لحظات و هو يسمع اللهجة الجديدة من ابيه لم يعرف بماذا يرد عليه صمت لحظات يفكر قبل ان يقول : اللهم امين ربنا يديك العافيه يا ابوي امي وين
الاب : امك قاعده دقائق بس اديك ليها.
مرت لحظات صامته لياتي بعد لحظات صوت امه : اهلا حبابك حمد نور البيت
حمد : تسلمي يا حاجة انا خلاص اموري اتوفقت كلها و ما عندي تاني حاجة موقفاين كلو جهزتو وبكره بسافر علي السعوديه
همس حمد : قول ان شاء الله ما تكجنا لينا
اطلقت الام زغروته : ايووووووووووووووووويووووووووووووي ايووووووووووويووووووووووووي يا ولدي تمشي و تجينا بالسلامه يا المهندس عليك الله يا ولدي اول ما تمشي تزور النبي و تسلم عليهو و قول لي امي مشتاقه الجيه و بتدعي ربنا تجي تزورك
حمد : ان شاءالله امي و اول ما استقر برسل ليك تجي تزوريه
الام : ان شاءالله
حمد : علك الله يا امي مافي واحده في اخواتي تمشي العرس و انا ...
ثاطعته امه : يا ولدي نكون احسن منهم
حمد : انا كلمت البنات و الله التمشي لو جيت بعد عشرين سنه ما اخليها
********************************************************************************
دخل احمد الي الوكاله الرابعه فهو منذ يوم امس لم يسمع بوكالة لديها فرصة عمل الا وذهب اليها رفع يده محيا سلام عليكم
موظفه : و عليكم السلام
احمد : انا خريج و سمعت انو عندكم فرص عمل مختلفه و .
الموظفه : ايوه فعلا انت وصلت ايه تخصصك بالضبط
مد لها احمد ملف قائلا : دا الملف فيه السي في حقي
استلمت الملف وتصفحته سريعا ابتسمت و قالت : ما شاء الله دا انت متوفق تماما
احمد : تسلمي
الموظفه : عندك محل معين خاتيه في راسك او راتب محدد
احمد : لا يا استاذه اي بلد و الراتب بس حاجة تكون مناسبة
الموظفه : ان شاء الله حتلقي الراتب المناسب مبدئا انت كده بتدينا و بتدي نفسك فرصه واسعه لان اغلب الشباب بضيقوها بانو بكونو عندهم دوله معينه او عندهم دول رافضنها و بعدين بشترطو في الراتب كده انت ان شاء الله حتلقي فرصه سريع
احمد : يا ريت يسمع منك ربنا
الموظفه : ان شاء الله بعدين احب اقول ليك نحن يمكن الوكاله الوحديه البتضمن ليك الوظيفه و ما بنشيل منك كل القروش حقت العقد بنشيل خمسين في المئية و باقي العقد من الشهرين الاوائل ليك في الوظيفه عندنا مندوب هناك
*************************************************************
كان سيد يقوم بالطبخ و جواره اثنان سودانيان
الاول : نحن خلاص اتفقنا علي كل حاجة الليله بعد العشاء حنهرب معانا تقريبا حداشر نفر
سيد : و كان قبضونا ؟
التاني " يا زول ما تخاف كل حاجة مجهزه تماما و حتي لو قبضونا قول حيعملو لينا شنو اكتر من النحن فيهو دا عائيشين كاننا غنم
الاول : اهم حاجة السكوت خالص ما تفتح خشمك حتي بعدين لما نطلع الكلام اشارات ما عاوزين بي غلطه صغيره نضيع خطه يومين بنفكر فيها
هز سيد راسه
في المساء و اثناء انشغال الجميع بالاكل خرج الجميع متسليلن مستفيدين من جزء خالي من الضوء اسرعو في السير و بعد ان سارو مسافة عشر دقائق قام الجميع بالجري
ثابت عندك كلك يا كلب تبعه الصوت صوت الرصاص
الي اللقاء ان شاء الله